سلام يا (مايد) عسى العِز قِدَّامْ

سلام لك يا شيخ يا نسل الاخيار

سلام لك بازكى تحيّات الاسلام

واحلى التحايا سَيّدي بْزين الاذكار

سلام لك والله يا نسل الاكرام

يا حر يا نادر ومن صفوة أحرار

جتنا البشاير سَيّدي عبر الاعلام

عبر الأثير وعبر نشرات الاخبار

وهاضت قوافي الشِّعر والزمتها إلزام

قمت انتقي من بينها الزين واختار

وتسابق الأوصاف زامٍ ورا زام

تزحم عليّه بين وِرْدٍ وْمِصْدار

روّضتها يا شيخ ثم جيت باولام

لاجل أفتخر قدّام وافين الاشبار

صغْت المثايل والتهاني بالاقلام

من أجل شيخٍ شَرَّفْ الشَّعب والدار

في موقفٍ به رفرقت شمْخ الاعلام

توافدت به ناس من كل الاقطار

موقف عجيب اشتد به سَيّدي ازْحَام

سَجَّلْ به التاريخ موعِدْ وتذكار

سَلّيت سيفٍ للشَّرَفْ بين الانام

بالعزم نِلْت السيف يا شيخ واصرار

سَلَّمْك يا (مايد) مَلِكْ (أردن) الشام

(الهاشمي) ما فيه شَكٍ ولا انكار

خَذْت القياده سيّدي وانت قِدّام

خلفك سرايا كلها بْطوع الاشوار

ما هي غريبه وانت والله ضرغام

يا شبل عودٍ حَيَّرْ الناس بافكار

يا نسل شيخٍ دامه الله لنا ودام

والله يجيره من تصاريف الاقدار

شيخٍ تعلَّى المجد للمجد عَزَّامْ

حاكم حكيمٍ بالسياسه والاشوار

مواقفه ما تنحصى بْعَدّ الارقام

(محمد ابن راشد) ذرى كل محتار

كم غاث (أبو راشد) ضعيفين وايتام

شعوب وْقبايل كلها صْغَار وِكْبَار

شوفه شفا يشفي من أعواق والآم

تِجْلى الهموم بْشوفته وكل الاكدار

أمّا الكَرَمْ ما اقول تشْهَدْه الايَّام

غيثٍ يعِم الدار من جود الامطار

ماخِذْ وسام العِز لِلْمرجله وْسَام

فارس شجاع وصار للشِّعر بيطار

وانته لزيمه سَيّدي وين ما قام

خَذْت الوصوف الطيّبه وْبِعْد الانظار

والنِّعْم (بوراشد) مَعَ سَبْعة أنْعَامْ

والنِّعْم لك يا الشيخ (مايد) بتكرار

أنجال (أبوراشد) مَعَاً صف وانظام

أحْدٍ يمين العود واحْدٍ على يْسَار

الكل منهم ماخِذٍ نَهْج لِيْمَام

نقوة حرارٍ تعتلي روس الاوكار

منهج معَلِّم فايقٍ كل عَلاَّم

ماخِذْ علوم الوقت في كل الادوار

بامجادكم غَنَّتْ عقيدات الاريام

واهدن لكم باقات وَرْدٍ مَعْ أزهار

يا الله يعل العِز عامٍ بَعَدْ عام

يحميكم الله من تصاريف الاشرار

وصلاة رَبّي عَد ما هَبَّتْ أنْسَامْ

على نبيٍ خَصَّه الله بالاذكار