البارحه ما ضاق (وادي رَمّ) من صوت الصهيل

لكن تعجَّبْ من (رقم واحد) ومن هو يَحْرزه

قال المدى: ما يحْرِزْ الطولات لى عزمه بهيل

والعذر للى عانده حَظّه وْ عَيَّا يَبْرزه

في كوكبة فرسان عِتْق خْيولهم مخْطِرْ يسيل

على عواتقهم كواكب .. والخيول مْجَهِّزه

ربّان عَزْم .. حْفوزهم نَسَّى هل الثار البتيل

دروبهم مِتْحَفِّزه .. وِ خْيولهم مِتْحَفِّزه

من كل عالي غارب وْمهره لها غارب سليل

قطاتها مَلْيَا لَكَنْ دَرْز القطا ما تَدْرِزه

رَحْبَةْ مناكِبْ .. صَدْرَهَا زاخر ظَهَرْهَا سلسبيل

وارِد مْعَنَّقْهَا .. وْ قِصَارْ ضْلوعها مِتْنَاشِزه

مَرّوا بَهَا اثنينه من الفرسان مَرْفَدْهم جزيل

هذا إذا راد أنْجِزه .. و هذا إذا راد أنْجِزه

نَشْمي على صَهْوَتْك يا (النشمي) عسى بالك طويل

و (جازيك) فوقه بَحْرٍ تْجَازيك غبّة (هِرْمزه)

من قال بان السَّبْق ما يقْسَمْ على فرسان خيل

(راشد) بالاوَّلْ مركزه و (حمدان) اْلاوَّلْ مركزه

سلاله مْن الطَّرْز الاوَّل فوق طَرْز أوَّلْ أصيل

أنجال شيخٍ يفْخَرْ التاريخ به وِ يْبَرْوِزه

شيخٍ يمِدّ مْن السحاب الوارف لْشَعْبه ظليل

حروف اسمه بالذَّهَبْ فوق القلوب مْطَرِّزه

يسعى الكَرَمْ بِيْديه سَعْي الخير للشهر الفضيل

من ساقه الله و الشعوب مْكَرّمه وِمْعَزّزه

تقول (أبو الطَيِّبْ) كتَبْ به قبل لا يلقاه جيل

تسْمَعْ نداه الصِّمّ وِ عْيون الكفيف تْمَيّزه

جَدَّدْ تعاريف التجاوِزْ واتّبَاعْ المستحيل

الممكن انّك تتبعه والمستحيل تْجَاوِزه

مخْطِرْ على الدنيا إذا عَدّى بهامتها تميل

في عْيوننا الدنيا مدى وْ في عْيونه الدنيا خْرِزه

إذا رمى صاب الهدَفْ واذا زِبِنْ عَزّ الدخيل

واذا انتهى من مِعْجِزه .. يرْجَعْ وْيِبْدا مِعْجِزه