يا خطوتين وثالثَتْها ياس وبْعيد المدى

قولي له ان المستحيل انّك تشوفه مستحيل

وان كان منّي ينتظر قولي فدا، يبشر فدا

هذي دروب القلب واللي مَرّها عابر سبيل

قبَلْت عذرك يا نهاية حبّ توّه ما بدا

ما في هجيرك فَيّ يا بَعْض الظنون وْلا مقيل

العِشْق بين الوَرْد في رايي وقطرات الندى

ما هو كما نتخيّله لكن شِتا والوقْت لَيل

ما كل صوت وله صدى، لو كل صوت وله صدى

تمرّدت بعض المشاعر غَصْب يا القلب البخيل

الهيجنه من فرحتي عند البدايه والحدا

ما كان دمعي بانسحابك يا مودّعني بديل

أنا اهتديت وكل من عنده قناعات اهتدى

لو أحْتِمِلْ حِمْلٍ خفيف وشِلْت أنا الحمْل الثقيل

والله يسامح كل من يكذِب عليّه .. ما عدا

اللي يقول ان المحبّه ما لها وَجْهٍ جميل!!