صوتك غمام وْخافقي جَرْهَدْ البِيْد
وانا .. ومقطوع المغاتير .. صادي
توحشني الذكرى .. وافِل التناهيد
ويفوح بنّي لك .. جروحٍ جدادِ
القيظ طاح .. وْما التفت للحيا جِيْد
وْلا ربّعت .. دار المودّين .. كادي
دام الجفا يخذِلْ .. غصون المواعيد
كيف أقطف البسمه وحزني بوادي؟
يا صاحبي والدرب .. دَمْع وْ تجاعيد
مَاْ ادري خذَلْته .. أو خذَلْني جوادي
مَرّيت بي والقلب هَمّه .. تراديد
والحزن ناسي .. والقصايد بلادي
وياما خذاني الصمت لِبْعيد .. وِبْعيد
وفرشت لِنْعاس الليالي سهادي
ليت الرجا .. والاَّ متى ليت بَتْفيد؟
لا تنتخي قلبٍ .. طَرَحْه الطرادِ
لليوم .. وِزْهور المسا في رجا عيد
وصِبْح المرافي عكس لَيْلَتْه هادي