صبحك صباح معطّرات الرِّياحين
صبحٍ تنفَّس بالضّيا من جبينك
صبحٍ تعطَّر بك نسيمه بعطرين
عطر الحديث.. وعطر لمسة يمينك
صبح القطوف اليانعه في البساتين
اللي روتها بالمحبّه سنينك
صبح العسل من شِفّتينك .. يشافين
جرح الفواد اللي تعلَّقْ بزينك
بُعد (المنال) يشقّي القلب والعين
هذي جروحي.. يا دوا القلب وينك؟
خَل اللقا ينوِرْ به العمر وِيْزين
هذي يميني لك.. وعطْني يمينك
إحلف .. وعَاهِدْني عهود المودّين
تبقى ضنينٍ لي.. وأبقى ضنينك
نرعى مودّتنا مدار الميازين
وان زاد لك شوقي.. يردِّك حنينك
يا بو عيونٍ مبهجات المحازين
تفداك عينٍ قَرَّت بْشوف عينك
يسعد صباحك يا عبير الرّياحين
يا مْنَوِّرٍ صبحي بطلعة جبينك