ذاكرة شِبّاك

تعبت مْن التَعَب ملّيت من دَرْبك نسيت خْطاك

شرِبْت مْن الظما حتى رويت وْفاض فنجالك

ذكرْت غْيابك اللي لونسى هالكلّ ما ينساك

يودّيك الغياب بْعيد عن عينك ويغتالك

يدوّرْك الحنين فْـ ذكريات الوقت ما يلقاك

يمرّك كل ليل كْثار ناس وْتسهر لْحَالك

(محمد): ليه هذا الحزْن في عينك يجيب أقصاك؟

(محمد): وِش بلاك تحب شيٍ ما تهيّا لك

نشَف فيك الكلام وْرِحْت من صمتك تصبّ شْفاك

غدَر فيك القصيد اللي تقول وْراح ما قالك

مَلَلْ نومك.. مَلَلْ يومك.. مَلَلْ دومك.. وما أدراك

مواويلك.. سَهَرْ ليلك.. يبي يْشيلك وَلا شالك

وسَعْ ضيقك.. نشَف ريقك ترتّل صبْحك لْظَلْمَاكْ

تعبْت تْهمّك أحوال العباد وتهْمِل أحوالك

تسلّل من ورا باب السنين لْذاكرة شبّاك

يساوِرْك المدى تقرا القديم وترسِمْ أطلالك

هنا: لِعْبَتْك ضاعت مَرّ طفْل بْلعبته بَكَّاكْ

هنا: دَمْعَتْك طاحت ضيّعوا فَرْحَتْك بِرْيَالك

هنا: سوّيت من وَهْم الزمان أحلام ما تسواك

هنا: فازت هزيمَتْك ورجعت تْجِرّ أذيالك

هنا: يلْبَسْك ثوب العيد ما تعرِف حِزِنْ دنياك

هنا: تجلس على صَدْر المكان وترخي عْقالك

هنا: أوَّل مرّه تْصَافِحْ غرام وترتجف يمناك

هنا: اول مَرّه يْطيح الكلام وتوقَف أفعالك !

هنا وَدَّعْت أبوك وانتقلت إنته إلى مثواك

هنا وَحْدك قدَرْت تشيّد أعظم حلم متهالك

طَلَعْت من الحياه بْـ (يرحم الله شايبٍ رَبّاك)

تغيّر (شووف وآنا ابوك) صارت (شِفْ وانا خالك)

(هنا) ترجع لشبّاكك كَبْرت وْصِرْت غير هْناك

تحاوِلْ وَحْدك تْطَفِّيْ وَهَمْك وتشعِلْ آمالك

وحيد إلاّ من اكثر بوح لا جابك ولا وَدَّاك

بعيد إلاّ من اقرَب روح راحت قبل تقرا لك

(محمّد): بَعْد هذا الهم وِش باقي لاجل أقراك؟

(محمَّد): كل هذا الهَم وِش خَلَّى لْعِذَّالك؟

تعبت مْن الحياة وملّت أيّامك تبي فَرْقاك

ذكَرْت الكل.. لكنّك نسيت تْمِرّ في بالك