تِتْكَاشَفْ بْروق فكري وِيْهَمِلْ نَوّه

يا كود وَبْل القوافي يشفي أوجاعي

بي من ظما البعد وَهْجٍ تَلْتِهِبْ ضَوّه

عَيَّا الصبر يحتويها بين الاضلاعي

ما كَنّه إلاَّ مفارِقْ ناظري تَوّه

يا طيف يرحَمْك ربّي قَلِّلْ الساعي

الحزن عوف وسقاني مرّه وسوّه

شَطَّتْني مْسِيْرته والحال ملتاعي

كم عام غيم المحال يْكِظّني جَوّه

لا العزم هَوَّنْ ولا هو فاز بإقناعي

عوقي قديم وْبَخَسْني ما هو بْتَوّه

لا تْقول لي يا مريح البال شِ الداعي

الاقدار تقضي على ما تْريد بالقوّه

يفز منها خِلِيّ الهَم مرتاعي

دنياً تخون الوعود ولا بها مْروّه

يومٍ ضحوكٍ ويومٍ فَجْرَهَا ناعي