يا قلب عطفك وارحم الحدب
صدري تَعَبْ وِضْلوعي نْحول
ترثع وانا اللي ناقلٍ كرب
وِهْموم فرقا عرضٍ وطول
من جور صرفٍ شَق بي نَدْب
دماه تنزف دون مدمول
يومه حسدني ناعمٍ عذب
غرٍ بهي الطلع عطبول
الجادل اللي همت به صب
وانا أدري أنّه صب متبول
حلمت حتى ساقه الرب
والحلم عاد أضغاثٍ وهول
من بان سِيْد العفّه الذرب
بان الزمان بْكل مجهول
لي داف مر وْكَدَّرْ الشرب
عذفٍ وقبله كان مشمول
عاث بشتات وباين القرب
وانفض شمل وشام مجمول
وانا بْرجا لو طال به درب
في كل يوم وشهرٍ وحول
له ارتقب واذب في عدب
ذاريه علم أحلى من القول
واتنحّره لو ما حمَلْ نَب
واقول هذا منْه مرسول
ومع الصبا أندب إذا هَب
أحلى سلامٍ راح محمول
سلام فيه الشوق والحب
من خافقٍ يرثع على نْحول