إن كان (مايد) خذا سيف الشَّرَفْ عادي

أعَرْف طبعه يحب الصعب وِيْرومه

يحب راس الشموخ النايف البادي

توصّله للمعالي قوّة عْزومه

شيخٍ على المجد والناموس معتادي

تفرّح اللي يحبّه دايم عْلومه

من صغر سِنّه وهو للمجد رَوّادي

من خطّة العود مفهومه ومرسومه

يمشي بتاريخ أبوه بجد واجهادي

يلوم نفسه قبل لا غيره يْلومه

واليوم فعله ثبت عَ روس الاشهادي

الاوَّل مْن اوّل وهو الاوَّل وْمَحْسومه

الجوله اللي دَخَلْها الأوّل عْنادي

بالفعل ماهوب حَظ وقسم مقسومه

المدح له من صحيح الفكر ينقادي

شيخٍ على هامة العليا كسَرْ حومه