شعر: ماجد بن سلطان الخاطري

على قواعد عظيم الهم والحسرات

بنَتْ قوّة الأحزان والفقد مبناها

طوتنا هموم الوقت في يَدها طيّات

وفي غبّة العثرات كم طال مسراها

ألا يا ذهابي طوّل الوجد والضيقات

وتناهيد روحٍ ذابها البوح تِتْلاها

ألا يا وجودي روّحت شيخة الشيمات

وشعى عقبها حر الضماير وْنَضَّاها

ألا يا وجودي فَقْدها للعَرَبْ طَعْنات

تسل الحنايا لين باحت عن أقصاها

ألا يا وجودي فقدها أكْبَرْ العثرات

لو الموت حقٍ ودرب الحق ممشاها

(رفيعه) رفيعة الاصل والفعل والوقفات

(رفيعه) وكل الطيب والجود مسعاها

(رفيعه) معانيها دلايل على الشيفات

لها بصمةٍ بالمجد ما شفت شرواها

هيهات من هو مِثْلَها بذا الزمن هيهات

خذت من (بيات) أحلى المعاني وأسماها

أم الجميع ويديها بالوفا جزلات

أم اليتامى وكل من لاذ بِحْماها

كم أنقذت من شفيفٍ يشكي الويلات

وياما ضفَتْ والعرب تجهل عطاياها

الجود فيها طبيعه هوب للمدحات

تمد باليمنى ولا تْعَرْف يَسْراها

أم الكرامه وأم العزم والعادات

يا وين نلقى مثل نادر سجاياها

بموتها ماتت الفرحه مَعَ البسمات

واللي مثلها محال الناس تنساها

وبموتها قلب الكرم والشهامه مات

الله برحمته والغفران يجزاها

يسطِّر لها التاريخ في أجمل الصفحات

تمثّل بها الاجيال وتقلِّد خْطاها

أمر الله الخالق ولا للملا حيلات

سوى الترحِّم عليها وذكر حسناها

يا الله تجعل سكنْها واسع الجَنَّات

وتحيطنا بالصبر من هم فرقاها

عقب شيخة الشيمات يا مَعْظَمْ الحسرات

عقبها الخلايق لو غدت ما فقدناها