هذا أنا في كل ما بي من عْيوب
هذا أوَّل عْيوبي كلام الصَّراحه
الحَق أشوفه بَعض الاحيان مَقلوب
واشوف في بَعْض المشاوير رَاحَه
كم لي أدوّر له عذر واغفر ذْنوب؟
حتى وصَل بالذنب حَد الوقَاحه
هنا عَرَفت انِّه مقَدَّرْ وْمَكتوب
أصَلّح اللّي ما استطيع بْصَلاحه
للحَق درب وْللخطا عِدَّة دْروب
مثل الكَرَم والذَّنب مثل الشفاحه
والكادح اللّي بينهم صار مَسبوب
الصِّدق طَبعه والحقيقه سلاحه
أصبَح وجوده بينهم غير مرغوب
وان راح عنهم يفرحون بْمَراحه
أثري وجوده بينهم مرعِبْ قْلوب
مزعِل بعض والبعض سِبَّة جرَاحه
والشَّاعِر اللّي ما لقوا فيه عَذْروب
لو حاولوا ما يقدرون اجتياحه
يعزف حروف الوجد لِعْيون مَحْبوب
وْيَقطف من وْرود المحَبّه وِشَاحه
غَنَّى لهم حرفه (هجيني) وْ(مَسْحوب)
ويجيد في كل البحور السِّبَاحه
ولو القصايد بين غالب وْمَغْلوب
ما تِفْرَدْ لْجَزْل القصايد مسَاحه