جات البشَاره خبَرْ .. يا فَرْحَةْ فْوادي

(أبو مبارك) رجَعْ وازدانت بْلاده

الحمد لله عدد ما غَرَّدْ الشادي

واعداد ما هَلَّت الأمطار وِزْيَاده

عافاه رَبّي .. وهذا مْنَايْ وِمْرادي

وِمْراد أهْله .. وْخِلاّنه .. وْأحفاده

كَم مَرَّتْ أيّام واحْنا بْهَم وانْكادي

من يوم سافَر علاج وطَوَّلْ بْعَاده

صار السَّهَر للعيون كْحَالْ وِسْهادي

ومن كان مَهْموم يَجْفي عينه رْقاده

له ندّعي بالشفا رب السما الهادي

يا الله تردِّه بخير .. وْيِبْلَغْ مْراده

واليوم عادت لنا الافراح بوْكادي

كَن الفَرَحْ توّه إلاَّ اليوم ميلاده

عَمِّي .. وْحسْبة أبوي .. وْجَد أولادي

يا الله تزيده عمر .. وِتْزيد في اسعاده

خال الشيوخ الكرام .. وْذِخْر .. وِسْنادي

لى حايزين الغلا من شَعْب وِقْيَاده

الشان فيهم يِرَد .. وغيث لِمْنَادي

والمجد والجود هُمْ أهْلِه وأسياده

هَنّيت نفسي .. واهنّي خافِقْ بْلادي

بِقْدوم شخصه وقلبي رَدَّدْ أنْشَاده

وابني (محمّد) حفيده زَهْرَةْ فْوادي

يهديه أزكى التهاني واصْدَقْ وْداده

وِيْقول مَبْروك باعْلى الصوت وِينْادي

جَدّي أحبّك .. ومن ما يْحِب أجداده؟