يا مبدأ الحكمه ويا قدوة الدار

يا قلب شعبك وانت روحه وراسه

هويّتك تفخَر بها شْعوب واقطا

وبك يفتخر عَرْش الحكم والسياسه

تسْلَمْ لنا يا الحاكم الوالد البار

اللي نِذَرْ عمره لداره وناسه

ياللى من كْفوفك جَرَتْ عَذْب الانهار

وِبْهِنْ تحارب كل فَقْر وْتعاسه

الطيْب من طيْبك غدا دوم محتار

من طيْبتك يا سَيِّدي فاض كاسه

الله عليك الله يا نسل الاحرار

يا ابن الزعيم اللي صعيبٍ مراسه

(زايد) ومن فضله نحن دوم الاخيار

بين العَرَبْ والمجد دايم لباسه

له نَدِّعي بالمغفره وقت الاسحار

وله جَنّة الفردوس سَكْن وْمداسه

وانته على نهْجه بْعَزْمٍ وباصرار

شِلْت الأمانه وانت عِز الرياسه

واصِلْ مسيرك كلّنا صْغَار وِكْبَارْ

نمشي تحت أمرك بفَخْر وحماسه

حِنَّا جنودك تشتعِلْ روحنا نار

بارض الوغى والضِّد يا ويل ساسه

يا قدوة الحِكَّام تفداك الاعمار

ويبقى الوطن مرفوع بك دوم راسه