حليف القاف ما تدري .. حروف القاف مَبْتوره

إذا غابت عن أركانك . تجي بالحيل مِنْهَاره

حروف القاف تفخر بك.. يوم انِّك كنت بالصّوره

تِجَدِّد عمرها الفاني.. وتنفِضْ عَنّه غْبَاره

تِسَلِّم لك قواعدها.. وْترَحِّب فيك مَبْهوره

حليف القاف رَوَّضْهَا.. وْرَتَّبْ جملة أفكاره

تذلِّل كايد المعنى.. وتبني قافك اسْطوره

رحيقٍ يسقي العاشق .. ويطفي بالحَشا ناره

لك الله يا حليف القاف ما تنعاف مأموره

تجي طوعٍ على كيفك شرات الجيش جَرَّاره

تباهي في وصايفها.. عقودٍ في نَحَرْ (نوره)

على جيد الغزال اللّي خَجَلْهَا هَيَّضْ أشعاره

تجي من كيف صاحبها ولا يحتار في شوره

يصنِّفها على كيفه .. تجي الابيات مختاره

وله باعٍ على عوص النجايب يثبت حْضوره

تزلزل من على الميدان إلى من بَيَّن شْعَاره

تجي بين النجايب باوَّل الميدان مَغْموره

رهيبه من عوَايدها.. ترِدّ السَّيف لِدْياره

تخَدْع اللّي يباريها .. لها صولات مَذْكوره

إلى من لاح في عينه.. خَيَال الكاس تختاره

تراضي من يضمِّرها.. تراعي فَرحة شْعوره

تعوِّض من بذَلْ مَعْهَا.. تَعَبْ وِجْهود جَبَّاره

ودايم مالك الشقرا.. يفوز بْذوق جمهوره

سلام الله على نَحْرٍ تنوض بْوِسْطه الشَّاره

سياسي فكره الراسي يواسي من حضَر دوره

يقول اللي خسر فيها.. ترى الأيَّام دَوَّاره

يزيل ا لحزن من باله .. يسَلّي نفس مَكْسوره

شفوق يطمع بفوز.. الصحافة تنقل أخباره

تجنِّب هجن (أبو راشد).. وباقي الهجن مَقْدوره

ترى ما ينفعك لى من خسرت الفوز يا خْسَاره

حليف القاف معروف بْحضوره يْشَكِّلْ خْطوره

يا ويل اللي وقَفْ يمّه.. به الآمال مِنْهَاره

شعر: مي الحبابي ـ دولة قطر