شعر: هادي المنصوري

يا بَعَدْ كل معنى في القصيد العمودي

لا تخاف انكساري تحت ضَغْط الظروف

والله إن الغلا ما يرتخي له صموي

بس لا صِرْت تِتْغَلَّى تضيع الحروف

ليه لا وانت عينك دوم تفضح وجودي

كل ما شِفْت دمعك شِفْت زولك ألوف

كَن عينك مدينه دمعها من جهودي

وْكَنّ أهداب عينك فوق حَد السيوف

لو تبيِّن جبينك تبتهل لك خدودي

والبَدِر لو يشوفك يعتريه الخسوف

بين متنك وخصرك أزْرَعْ أحلى ورودي

لو تمايل عليها يذْبَل العِطْر خوف

يا برودي إذا فارقتني.. يا برودي

ويا احتراقي إذا شفتك تمل الوقوف

لا تخاف الكلام وْلا تهاب الحسودي

صاحبك لو يمرّه حاسدك ما يطوف

باغْسِلْ شْراع جَدّه لو تعدّى حدودي

وباكْتِمْ آهات صوته لو يكثِّرْ هفوف

إنت خَلّك مسالِم لكن إزْهَمْ جنودي

لو تبيها معارك لك بارِصّ الصفوف

بس لو هَبْ طرفك.. ضمّ نسمات نودي

واحْرِقْ الهَمّ جمره وسْط عَرْض الكتوف

واعتبر من ضحايا الحب هِمَّة زنودي

ما تشوف الجنون إن كنت لي ما تشوف

وانت تضرب مثالك نار تلغي خمودي

لو هوانا مثَل.. باعطيك أحلى وصوف

وصف اْلاوّل ترى ناقَتْك حَبَّتْ قعودي

وآخر الوصف هذا كل ما في الرفوف

الجنون وْغرامك سوق أسهم نقودي

راس مال الشراكه به كسادْ ووقوف

لو أشوفك بدا سَهْم الغرام بْصعودي

ينتعش سوق قلبي ويمتلي كل جوف

لاجل هذا.. وخاطر.. كل معنى عمودي

اجْبِرْ العين مَرَه.. قبل ضَغْط الظروف