ناسٍ هواهم سَرى في الروح تأثيره

غالي غلاهم على ربعي وعرباني

أحبّهم والهوى عَيَّت تفاسيره

عن وصف ما يحتوي قلبي وْوِجْداني

وانا اشهد انّي لْهَواهم ما اذْخر ذْخيره

وانا اشهد انهم حبايب ما لهم ثاني

شوقي لهم شوق خَلَّى القلب في حيره

شوقٍ يهِزّ بْضميري كل برهاني

أزورهم والقَلِبْ ترقِصْ تباشيره

وامنّي الروح ليت القرب يهناني

مثل السراب الذي يسْبَقْك في سَيْره

كلما نويت الوصل حَظّي تعدَّاني

وللوِد حَرْبٍ ولا تنفع محاذيره

كود الصبر عَـ الّذي قَفّى وْخَلاّني

وانا مرادي أشوفه مِدّه صْغيره

واهنا ويهنا بْلقانا حلو الاعياني

واغِط بسكون وِدِّه دون تفكيره

وآسج وانسى زمانٍ منّه آعاني

إلاّ الرجا ما تناسبني تدابيره

من مال حَظّي تهاوَتْ كل الاركاني

يا من سلكت الهوى غفله وتغريره

إحْذَرْ ترى الحب ما له عهد يا فْلاني