يا ليتَ وَصْلي وْوَصْله يَزْعِلْ الشَّاني

والله لاضمّه وِسِطْ عيني واغَضّيها

يا غَمّ قلبي عليه وبوح وجْداني

يا راحة النفس حَاضِرْها وماضيها

البخت عَيّا وْظِمْي الحظ واظماني

الله يقدَّرْ على باقي لياليها

ليتك تعرفين كيف البعد شَقَّاني

دموع عيني حَرَقْ اْلِخْدود جاريها

والله ما انساك لين الروح تِنْسَاني

ومشاعر القلب تَثْبِتْ لك قوافيها

كَم ليلةٍ ظالم الهاجس تحَدّاني

يجْمَعْ وْيَفْرِقْ ويقتلني ويحييها

ذكرى بها مْزون دمعي تَحْرِقْ أوجاني

لي ساقته غيمة أحزاني لطاريها

أضناني البعد عَنْك.. أي والله أضناني

واضنتني هْموم قلبٍ بان خافيها