شعر: صالح الربيعي

الدّوري اللي قبّل يْدين (فَزَّاعْ)

خَلَّه يقبّل كَف (فَزَّاع) خَلّه

ما دام راس المجد للمجد طَمَّاع

تَلّه مِثِلْ حرٍ على السَّبْق تَلّه

حوّل عليه.. وكن عينه تبى القاع

لكن لِطَمْه وللسما عقب شَلّه

في ساعةٍ فيها مواقيف وِصْراع

وكلٍ لدرع الدّار سيفه يسِلّه

الدرع (أهلاوي) على دَم واطباع

اللي على (زعبيل) ساقه وْدَلّه

وانا متابِعْ سَيّدي.. وايه تبّاع

(فَزَّاعْ) أجِلّه.. أيه.. (فَزَّاعْ) أجِلّه

أحب فيه إنّه قوي راس وِذْراع

شيخٍ عزيز ولا تجي منْه زَلّه

رفيع شان.. وله سنا العِز ينصاع

ينصاع بعضه له.. وينصاع كلّه

اللي غلاه يجول من بين الاضلاع

قِدْ له ثلاث سْنين قابض محَلّه

أفْرَحْ ليا من قال (يا مرحبا السّاع)

في المجلس اللي فيه عودٍ وْدَلّه

في ذمّتي ذمّه رغم كل الاوضاع

إنّي أحبّه دون ليه ولعلّه

ما اكْتِبْ قصيدي فيه من شان ينذاع

والاّ أشوفه مِنِّشِرْ في المجلّه

لكن أجِلّه سيّدي طايل الباع

والاَّ انت (يا ماجد) في ذمّتك قِلْ له

قِلْ له (غريب الدار) يا الشيخ (فَزَّاع)

ودّه يهنّي حَضْرتك من مَحَلّه