شعر: قمره

يقطع القلب يا (نوره) يا ويلي عليه

تَلّني مثْل ما تَلّ الصعَب بالخطام

آه لولا القبيله ومن كذيه وكذيه

صَدّقيني بانادي له بوسْط الزحام

باسأله وين ماخِذْ قَلْبها دون ليه

بنت تَحْسِب بَعَض الاشيا وتخشى الملام

صِدّ لي يا بَعَد كل الصدَف والوجيه

يا عساها على ايدينك ومِسْك الختام

صِدّ لي لا تخلّيني لهَرْج السفيه

وْحِلّ منّي قيودي واخْذِني للسلام

يا عسَل سعْد حَظّ اللي قدَر يحتويه

يا عيونٍ تناديني لبَحْر الغرام

سلْهمَة رمش عينك صِحْت منّه عليه

وجيت كلّي على بعضي وضاع الكلام

يا هَلِي سامحوني والعَتَب لا يجيه

قسمة الله لا يمكن تسمَّى حرام

وايد الناس لكن بس هو اللي أبيه

يا كذا يا فَلاَ يا عاليين المقام

حِلْم كل العذارى واثق وْلا عليه

منْيَة اللي تمنّى مِ البقايا وصام

حسبي الله على ابليسه توهّقْت فيه

وين ما لاح بَرْقه راغ قلبي وحام

يُوْه يا نَظْرته يا ضِحْكِتِه يا حَكِيْه

يسري بْمَسْمعي ويْحِسّني في العِظَام

كَنّي الطفله اللي تحتويها يديه

حِلْم راوَدْ خيالي صار له كَمّ عام

الله يْهِدّ عدوانه وْيرْحَمْ ذويه

مشغلنّي وْمِحْرمْنِيْ لذيذ المنام