قولوا لها اللي تواصلني وتقطعني
أمّا تواصِلْ أو القَطْعه هي القطعه
ما تذكر إش صار والاَّ ناسيه يعني!
من قال مِنّا أنا رايح بلا رَجْعه
والحين لو جيت ابارجع وش يرجِّعْني
ما دام قالت باروح وقلت للقلعه!
قولوا لها إن كان ما عادت تتابعني
باقي على خبرها والسِّمْعه السِّمعه
لا تْقول (سَبْعان).. وش عندك تسَمِّعْني
حِنّا ترى رَبْع .. ما ابغي منها رِبْعه
ما ني بْ(كاظم) إلا حَبَّتْ تسَمَّعْني
ولا ني بنغمه على جَوَّالها (الدمعه)
صحيح (سبعان) بِشْفاها تلوِّعْني
بنت الذين تقول البنت مرتفعه!!
تمدّها لين تاخذني وتوجعني
سبعاااااان. واقول وش تبغين يا وِرْعه !
والحين ما عادني سبعانها المعني
ولا عاد حتّى (علي) منها تجي سَنْعه
راحت عليها.. تجي بكره تراجعني
بعض القصايد تجي ما تلحَقْ الطبعه
لا تْقول (سبعان) أصْلاً وش مْسَبِّعْني
إلاَّ انها تحبني سبعه على سبعه
أسبوع تولَهْ عَلَيّ واسبوع تقطعني
تزْعِلْني (السبت) وِتْصَالِحْني (الجمعه)
والحين تبغاني أرْجَعْ وش يْرَجِّعْني
وحياة غنْج الشفاه وفتنة اللمعه
لا اقَطِّعْ.. قْليبها.. قبل ان يقطعني
واعِد.. قطعه ورا قطعه ورا قطعه
ما عاد فيها كذا والاَّ كذا يعني
أنا كذا مقتنِعْ والبنت مقتنعه
الله يقطع سوالفها ويقطعني
إن كنت صادق بهالتهديد والقَطْعه