مبروك يا شيخ يا عال الوقار
مبروك منّي ومن كل الحضور
مبروك ليلة زفافك و(العمار)
وعساه بيتٍ على الخير مْعَمور
عَد الشجر والمرابع والقفار
وعد البسيطه ومايات البحور
واعداد ما تنبت الأرض الخضار
لى قِدْ سقاها من الوسمي مطور
واسمى التهاني ومنظوم الاشعار
نهديك منهن أكاليل الزهور
منثورةٍ في زلال الماءْ نثار
والورد والفل وانواع العطور
وان هَب ريحٍ من الطيّب ودار
نهديك من طيّب الريح البخور
يا منبت العز يا صفو الحرار
يا زاكي الجد يا نسل الصقور
ملكتوا الطيب بِنْفوسٍ صغار
وتواضعٍ لا كبار ولا غرور
ما يخسر اللي تنقَّى من خيار
والذهب غالي وسلعه ما تبور
والبيت بالساس لو تبنى جدار
وانته على الساس وثّقت الجسور
وتحيّةٍ للكبار وللصغار
وعسى لياليك وايّامك سرور