شعر: بنت الإمارات

يا اللي مسوّي حفلةٍ ل(الفلنتين)

ما هي بْوِرْثٍ لك وَلا هي بعاده

ولا هِي خَلَف جَدِّك ولا هي من الدين

وْلا حَطّها رَبّي عمود العباده

بِدْعه وْحَلَّتْ في بلاد المصلّين

وكلٍ ينافِسْ في البِدَعْ باجتهاده

إلاّ الذي قابِضْ على الجمر بِيْدين

وعنده على صَدّ المفاسِدْ إراده

حَفْلَتْك لى فيها جمَعْت المغنّين!

ما تِلْحَقِكْ مِنّا عليها إشاده

ما شِفْت في (كشمير) فِعْل النساوين؟

وشلون لَفَّنْ عَ الجراح الضماده

لى نَدِّدَنْ ضِدْ البِدَعْ في الميادين

وتْآزِرَنْ للحَقّ نَصْر وْشَهَاده..

هناك وين الناس هَلْكى مساكين!!

ياَ فَرْقِنَا عَنْهم وما اطوَل بعاده!!

ضعَاف لكن في المواقف قويِّيْن

وايمانهم ما مات وَهْج اتّقاده..

وانته لـ (عيد الحب» سَوّيت تدشين

وْوَقّعْت ميثاقه وبَنْد اعتماده

وْصَفَّيت شَمْعك وَرْد في شكل قلبين

واحييت ليل الغافلين وْسِهَاده

مظاهرٍ شَتَّى بليّا مضامين

ولا اشوف في هذي المظاهر سعاده

يا الله على هذا الزمن إنّك تْعين

وِتْعَوِّضْ القلب الشقيّ الشهاده

اليوم مال الزّين في كَفّة الشين

والناس تِتْمَادى على غير جاده

والوَضْع مِخْجِلْ ما يبى صَمْتٍ وْلِيْن

ولا في مجال الحَقّ صَبْر وْهواده

ما بين لاهينٍ وما بين مِلْهِيْن

راحت معاني الناس خِسْر وْهباده

واللي يقول الحَقّ ما له موازين

والناس تَنْقِد فِكْرِتِه واعتقاده

يا (رَنّةْ التَّنْبيه) في ذِهْن ناسين

يا الله عسى التّنبيه يثْمِر إفاده

بلادنا ساس القِيَم بالبراهين

ومْعَدّيه باقي الدوَل بالرياده

وِتْهِمّنا تبقى على النوف والزين

ولا خَير في اللي ما تهِمّه بلاده

هذي رساله في بيان العناوين

وموضّحه من دون نَقْص وْزِيَاده

لاهل الأمر والشور واهل القوانين

واهل السعاده والشِعِر والسياده.