شعر: سالم الزمر

يوم أينعت واثمَرْ بها كل بستان

أضْحَى لها مليون عاشق وشاري

ويوم أنها ريح وتباريح واشجان

ما كان يطريها من الناس طاري

خوفي على الإنسان يا ويل الانسان

يوم يْغَدي ذكرى ذَرَتْه الذواري

يوم يْغَدي أطياف والخَلْق ألوان

يا ضيعة ألوان البَحَرْ والصحاري

يا خوف خوف اللي على الدار ولهان

يا كيف وَلْهَانٍ وانا اشوف داري

لَعَلّه الخوف المعَلَّقْ بالاجفان

للي مضى شَبّيت وَجْدي وناري

وِدّي أصيح وداخلي ضِحْك عطشان

أضْحَكْ وْضِحْكي مثل غيث البراري

ما أعْجَبْ الضحكه لها وَجْه وِلْسان

وما أعْجَبْ الدمع العزيز مْتواري

وما أعْجَبْ الأيّام أفراح واحزان

وبين الفَرَحْ والحزن ليلي نَهَاري

(مايد يا بن سلطان) للمال سلطان

وللوجد سلطانٍ على الناس جاري

يا (الخاطري) عندي كثيرٍ ولا بان

إلاّ قليل وداخل الروح واري

ما باقي إلاَّ الشِّعر والشِّعر أغصان

ما هَزَّها من هو من الوجد عاري

يهِز غِصْن الشِّعر بالشِّعر فنّان

غيره يبات ينام وِيْبَات ساري

ساري فكر ولهان ظميان رويان

صَقْرٍ وياما في البرايا حباري

فاحْذَر من الوقت الذي عاد فَتَّانْ

واحْذَرْ من اللي باع يوم انت شاري.