تأمّلات مسلم

إحْمِد الرحمن إنِّك في الحياة

وان قلبك نابض بْأمر الإله

وانّك الساعي على رِجْلك سليم

وان غيرك بين آه وبين آه

وان عينك شافت شْموس الصباح

ما انْحَرَمْ شوفك من الصبح وضياه

وانّك الواقف على اقدامك تطوف

ما يردّك شوك دربك أو حصاه

وانّك الشارب من الماي القراح

ساق لك رَبّك شرابك من سماه

واحْمِدْ الله إن لك عينٍ تشوف

وان غيرك وجه خِلِّه ما يراه

وان لك بيتٍ ولو بيتك صغير

وان غيرك ما لقى سِتْره وْغطاه

وان لك تعبير وِشْفاه وْلِسَان

وان غيرك لا كلام ولا شفاه

وانّك النايم وغيرك ما ينام

شوف غيرك نوم أجفانه جفاه

شوف غيرك له مَعْ الوَنّات عمْر

وانت عمْرك في بهاه وفي هناه

شوف أطرافك صحيحه يا صحيح

وشوف غيرك أْتعِبَتْ رِجْله خطاه

شوف وجهك كل ما يحمل جميل

صوَّره رَبٍ تسامى في علاه

شوف دام الوقت يسمح والظروف

واشكر الرحمن رحمن الحياه