مواجيب

معنى البكى يا سيّدي عندنا عيب

والدمع ما ينزِلْ على غير مجراه

نفخر بعاشق هل دمعه تراحيب

والاّ مفارِقْ هَل دمعه لما جاه

أو شاعِرٍ كِثْرَتْ عليه التعاذيب

يكتبْ قصيده من دموعه ويقراه

لا سِرْت ضيف وْقَلّطوك المعازيب

في حكمهم خَلِّك على كيف معناه

يوم انت تدري وش حياة المواجيب

لا عاد تشكي لي وانا اقول عِزّاه

لا تفتكرها لعبةٍ في الأساليب

اللي يقول الصدق يا صاح نَجّاه

والله ما تحيا محبّة الاكاذيب

قال المثَلْ يا من زَرَعْ شَي يلقاه

ياما سمعْنا عن غرام الألاعيب

وكم واحِدٍ غَرّه حبيبه وْخَلاّه

ومن طِبْعنا للطّيب نشريه بالطّيب

نفداه طيب ونعشقه طيب نفداه

وِلْك البقا لو هي جروحٍ معاطيب

نفرح بها ما دام تطري بذكراه

لو كان حبهّ في حياتي مصاليب

بانصاه مهما كان والله لانصاه

والحب ما ياتي برغبه وترغيب

ولا كل من هو حَل بالقلب يرعاه

وما هَمّني لو لاح في راسي الشيب

اللي يراعي الود بالوِد لارعاه

سألت قلبي عن بقايا المكاتيب

والحرف ياللي بالحشا له نِقَشْنَاه

لَذَّةْ غرام الحب نار ولواهيب

يشفي بها الظامي وهو ما شَرَبْ ماه

ما خيمةٍ قامت بليّا مطانيب

واللي انكتب باللّوح لابد نرضاه

ينهَدّ قصرٍ لا ابتلى ساسه الريب

وخيمه عِمَدْهَا الصدق تبقى لعيناه