تواعدنا على نفس الحديقه
أشيل مْن الوَلَهْ كل الأماني
قبل ذاك الوعد جيت بْدقيقه
أخاف أنّي نسيته لو ثواني
يشِبّ القلب في جوفي حريقه
على ذِكْر الوَعَدْ يضْحَكْ زماني
نطَرْته والصدِر ما فيه ضيقه
أبي يعرف بشوقي مَعْ حناني
ترقّبته وهو جاي بْطريقه
يسابق خطوة أقدامه عَشَاني
وفجأه بانت بْعيني حقيقه
تمنّيت بْحضوره ما لقاني
سألته والحزِن وشلون أطيقه
عسى قلبك حبيبي ما نساني؟
نسيت العمر والورْد وْرحيقه؟
نسيت انّي على فرقاك أعاني؟
أبي تسمع كلامي لو دقيقه
حسافه ما دريت أنّك أناني