آفة الخوف

أيْ خوف؟ خَلّ الخوف.. واللي تخافه

إطلِق عنان الحب والشوق يسرِجْه!

إلْغ الوَرَق والحِبْر.. والْغ المسافه

خَلّ الغرام يْكون مِ الوَجْه للوَجْه

زَيّن قصيدٍ زيّن الحبّ قافه

غَنّه ودَنْدِن به ومَوِّلْه واهزِجْه

إنكِر وجود الضيق رغم احترافه

وان ضاق وقتك قول: يا الله فَرِّجْه

إكْسِرْ قيود الخوف وانفِه ونَافِه

وافتح لحبّي باب في الصدْر واولِجْه

العمر فرصه.. وآفة الخوف آفه

تاكل حصاد العمر وِيْموت بَهْرَجْه

إغْنَمْ زمانك دام وافاك وافِه

لا صار قادي ليش بالعِذْر تعوِجْه

تبطي ويمضي الوقت.. خَلّ الكلافه

الوقت يرْكِض وانت بالكاد تعرِجْه

كم قلْب قبلِك خاف والوقت طافه

ما اريد قلبي باوّل الدرب تَمْرِجْه

لي قلب واحد وانته أوّل مطافه

مسراه حبّك وانت يا حبّ مَعْرَجْه

لا جاك قلبي صافي الوِدّ صافه

وان جاك طالِبْ.. مِدّ وايّاك تحرِجْه

أوْلَجْت حبّك بالدَلَع واللطافه

والحبّ يملك من على المُلك توَّجْه

للحب عينٍ شافت القيد تافه

وللحب قلبٍ شاف في السور مَخْرَجْه

إلْغ الوَرَق والحِبْر واطْو المسافه

ما غير خدّك لا غفا بْصدري أثْلَجْه