وَحْشة مكان. وْطَرَفْ دَمْعَة حِزِنْ وارتباك
رعشة خفوق وْفضا ضيقه وتالي قصيد
هذا محَلْ ضحكتِك يوم أزْهَرَتْ في شفاك
وهذا محلّي وانا اقصِد في شفاتك واعيد
تسْبَح يِدي في جديلك والغمام يْغَشَاك
وانتي تقولين أحِسّ اليوم ذا يوم عيد
بقى مكانك في قلبي يشتكي من جفاك
وبقيت أنا بَعْد ما غبتي هنيّا وحيد
كانك نويتي فراقي دوك قلبي معاك
ما عاد لي فيه حيله أدري إنّه عنيد
أذْكِرْك نجمه لمعتي لين ذابت سماك
وانا خطَفْتك على غفلة حَسَد من بعيد
هالحين تبغيني أنسى (لعنبو) من نساك
أحاول أنساك، وانسى، وابتدي من جديد
يا غاليَه صدّقيني ما اقدر آصف غلاك
وانتي المراجل وانا قلبي (طلال الرشيد)!