أبْدَعْ الأمثال واقول القصيد

قالوا العِرَّافْ هذا وِشْ بلاه

الشِّعِر عندي على أمّا به يزيد

مثل سيلٍ يندفِقْ في الأرض ماه

وَنّتي يوم الملا بالنوم سيْد

وَنّة اللي طاح ما تسمع نداه

يا نديمي لا تخَلّيني وحيد

إعتني بالرَّدْ رَيِّعْ لي نباه

إن نظَرْته شفت ذاك اليوم عِيْد

لى خدوده مثل بَرْقٍ في سماه

إن ضَحَكْ لك غالي اللولو الشهيد

تشتعِلْ نار المحبّه في هواه

لى دعى في الروح حَرَّاتٍ وجيد

بو معنَّقْ عنق ريمٍ في فلاه

لا تعاتبني وانا ما لي عضيد

الوعد لى صار ضَيَّعتوا لقاه

إن جفوك الناس يقْرَبْ لى بعيد

كل حَدٍ يعتني في مستواه

كل شَيٍ تفتخر به ما يفيد

لا تفكِّر غير في حْروف الصلاه