غياب الشمس وِحْضور الغياب
يبكِّي فرحتي وَقت المغيب
يصوِّرْ ذِل وخْضوع وْخَراب
ويوحي بانكسارات اللهيب
أشوف النور يتلاشى ذهاب
واحِس بْخَافقي ينحَبْ نحيب
وفوق هْنَاك يتخطَّى سحاب
وعيني تمطر الدمع السكيب
ويفتح للدجى ألفين باب
ويكسر خاطري ضَيٍ غريب
يلاقيني ويغمرني عذاب
ويهدي وقفتي نسمات طيب
وتِتْعَانَقْ ظنوني والضباب
ونظراتي بعيده كالرقيب
تخالجني همومٍ ما تهاب
إذا حَسّيت بالظلمه قريب
تكذّبني سؤالات الجواب
وْيَصْدِقْني السكون ولا يخيب
يعاتبني المسا أقسى عتاب
وْيَحْبِسْني بلا نور وحبيب
وكنّي م السما أسْمَعْ خطاب
يعَلِّلْ مهجتي وقلبي يطيب
طلبتك يا شفق رِدْ الصواب
أخاف الشمس تاخذني واغيب