بنات القصيد

يا رفيق الغوى والغَيّ وانته رشيد

النوايا تراها صافيه صافيه

الخطاوي وحيده والعزايم حديد

وتاركين الستور الضافيه ضافيه

بي جروحٍ تكفّي للقصيد وْتزيد

حتى لو قلت ما هي كافيه، كافيه!

بس لا جيت أبَاكْتِبْ قِلْت: ويش الجديد

يبدي القلب عِلْم وخافيه خافيه

يا (علي) كانها ما جَت على ما تريد

خَلّها تْروح واللي لافيه لافيه

كان حبْر القَلَمْ ما صار دَم الوريد

خَلْ بنات القصيد الجافيه جافيه

لا انت باللي يغنّي كيف ما جا النشيد

ولا انت باللي يزيد القافيه قافيه

أنت لك راس مالٍ غير حرّ القصيد

شيمةٍ للوجيه الوافيه.. وافيه

خَلّ هالصفحه البيضا على وَعْد عيد

خَلّها مثل قلبك.. صافيه صافيه!!