تغرودة مطَر

صوت المطر يوم ضْحِكَتْ غيمه انهمر

حَرَّكْ مشاعر عاشق الغيمه وْمَرّ

أمسى ينادي غيمته يا غيمتي

شوفيني أشْرَبْ من عيونِكْ والسَّهَر

والغيم ساقي وكل غيمه مْسَافره

مَرَّتْ على قَلْبٍ من الهَم انكسَرْ

واحيت عروق الشوق في قلب العنا

يوم غْسِلَتْ هَمّه وباحت بالمطر

واصبح يغنّي آه يا صوت المطَر

ما أجمل الدنيا إذا الغيم انهمر

ما أجمل الدنيا إذا عين السما

فاضت على الصحرا وْوِدْيَانْ الحَجَرْ

والغيم سِرّه في القلوب العاشقه

مكنون وان باح المطَر شاع الخبر

واستبشرت مِنّا النفوس الظاميه

وِتْهَلِّلَتْ مِنَّا أحاسيس البشَر

وِتْبَلِّلَتْ مِنّا طيور مْهَاجره

لو لا المطَر ما عاد من غاب وهجَرْ

لولا المطر ما أزْهَرْ الوادي ولا

تدري وجوه البِيْد عن لون الزَّهَرْ

لولا المطر ما غَرَّدْ الشادي على

غصن الهوى في لحنه الشادي صوَرْ

لولا المطر ما ذابت ألوان السما

في الأرض وانسابت لنا لونٍ خَضَرْ

لولاك يا صوت المطَر يوم انهمر

ما غَرَّدْ العاشق مَعَ الغيمه وْمَر