مشاهد أولى

* مشهد أخير!

الليله ليلة أمَل.. بسّ بْـ ألَمْ عالي..

شَدّت قناديلها وارخَتْ ستايرْها..

قامت توزّع حكاياها على بالي..

وفي بالي إنّي أماشيها.. واسايِرْها..

من أوّل الشيطنه لآخر شغَب غالي..

مروراً بْـ أمنيَه.. تذري.. وآذايرها..

وحدي توحّدْت بآخر مشهد لْحالي..

وحدي تكفّلت عينٍ هَلّ حايِرْها..

* مشهد منطفئ

الليله ليلة أمل مطفاي.. وايديني..

مغموسةٍ في مسا بارِد ومحشوره..

ما رِحْت أعَلِّقْ على جدرانها عيني..

موؤودةٍ نَظْرتي وِخْطاي مَكْسوره..

ويْميني البارح اللي كانت يْميني..

اليوم حطّت هموم الأمس في صوره..

آباتنفّس فَرَحْ لو كان يمديني..

وآقول لاجمَل سنين العمْر مشكوره

* مشهد خرافي!

الليله ليلة أمَل.. واحلام مسجونه..

والياس والناس والهوجاس والحيره..

الليله ليله خُرافيّه ومجنونه..

تحيا بْأمَلْها عُمُر وِتْعيش من غيره..

ما والله إن بِحت بَعْض الهَمّ تقوونه..

وِش عاد لوْ إنّ بحّيته بْـ حذافيره؟

هالدفتر اللي يلِمّ الدمع مكنونه..

أحسَن ولا عين تُوسَع له ولا تْجيره..

* مشهد مشتعل!

الليله ليلة أمل خافِت ومِتْخافِت..

واصابعٍ من شموع وْجَذْوةٍ حَيّه..

وعْيون ما كنّ لا شافت ولا انشافت..

مركونةٍ للعتب واحلام منفيّه..

واشياء طافَت ولا ادري كيف هِيْ طافت!

لكنّي أدري غدَتْ أشياء منسيّه..

والطفله اللي تشظّت بالعنا خافَت..

واضْحَت مَعْ الناس مَعْزوله ومطويّه!

* مشهد جديد!

الليله ليلة أمل.. مكسور.. ومْرايَه..

وفنجان غصّات لا فارغ ولا مَمْلي..

واوراقٍ مْبعثره.. وِنْهايَة حْكايَه..

وشْتاتي المرّ بين أهلي.. وبين أهلي!

واحساسي إنّي مَعَ الأيَّام منسايَه..

وَرْده ذوت من ضيا في عالَمٍ كِحْلي

والشِّعر واجمل شخابيطه.. ومعنايَه

وايّام عَ البال.. لا تِقْدَمْ.. ولا تبلي!

* مشهد أول!

الليله ليلة أمل ميّت ومتأنِّقه..

طاحَت على صمتها المجنون كم نَجْمَه..

كانت كذا باهته جداً ومتألِّقه..!

والحِزْن زاد بْألَقْها من شجَن وَسْمه..

كانت مَعَ البدر سهرانه ومتأرِّقه..

ترسم سماها أمل وِتْخاف من رَسْمه..

تِتْعَلَّق عْيونها بالنور متعمِّقه..

ويصبِح عليها الضيا ما ينطبع وَسْمه!