معدن الجود

بكَتْك العروبه واجزعت من لذيذ النوم

لكنّ البشَر في إرادة الله مَغْلوبه

أقوّي عزومي بالصبر والكدر مَرْسوم

على وَجْنةٍ من حارِقْ الدمع مَعْطوبه

تمنّيت لكن التمنّي عن المقسوم

ما يْرِد مكتوبٍ والاعمار مَحْسوبه

يا ليت الخبر لى حال سعد الليال هْموم

أمْهَلْ وفيٍ شَفّ شعبه وْمَطْلوبه

يا ليته تعَدَّى درب ذاك الشهم يا قوم

يا ليته تأنّى لو المقادير مَكْتوبه

بفَقْده تردِّد وَنّتي لاسعٍ مَسْموم

لَهَبْ نار حِزْنٍ بين الاضلاع مَشْبوبه

جَعَلْت الرجا باللي وجَبْ فَرْض شهر الصوم

يرْحَمْك رَبٍ غافر لْعَبْده ذْنوبه

عسى الله ينوّر مَرْقدك كم فَرَجْت ضْيوم

ويجزيك بالغفران والعفو والتوبه

كريم السجايا لِبْس حسن الاخلاق هْدوم

بفرقاه فنجال العنا كاد مَشْروبه

بكيتك نَعَمْ.. يبكي عليك الوفا (مكتوم)

بكَتْك العروبه معدن الجود وِدْروبه

قلوبٍ حَرَقْهَا خبر نَعْيِكْ ضحى هاليوم

انهارت وهي من صدمة العام مَصْيوبه

ترجَّل حصانه شهم قَايد يذِل خْصوم

نزَلْ جار من فقده كسانا الحزن ثوبه

نزَلْ جار (زايد) لى عليه الصبر مَهْزوم

بَعْده نقاوِمْ موج الاحزان بِصْعوبه

أبونا رَحَلْ لكن ذِكْر الكرام يْدوم

وهو خَلَّدْ التاريخ ذِكْره على أسلوبه

أسلوب التسامح والوفا وِلْعطاه سْلوم

يمِد الجميل ويعطي الحق بِوْجوبه

ولو كانت الدمعه ترِد القضا المحتوم

بكَيناه دَمٍ والرمل فاض عَرْقوبه

عساهم جوار الخالقْ القادر القيّوم

عظمٍ كريمٍ ساتر لْعَبْده عْيوبه

وعسى من خَلَفْهم حكمهم يا العليم يْدوم

ويحفظ وطَنَّا ودين الاسلام وِشْعوبه