لو بكيت وبكى مثلي كثير الأنام
الحزن من (دبي) الجود لين (القصيم)
اعذرونا ولو نبكي على الجود عام
المصيبه جلل وِفْراق مثله أليم
مات شيخ الكَرَمْ نسل الرجال الكرام
من كريمٍ كريم ومن كريمٍ كريم
ويوم جانا خبر موته رفيع المقام
هلّت دْموع أهالينا رجال وحريم
والمصاب الجلل وِدْموعنا والسقام
والحزن عَلّمَنّا كيف موته عظيم
سيّد الجود رجّال الوطن والنظام
وشعب فاهم وفوق الفاهمين الفهيم
رسّخ الوحده وعم المداين سلام
ينحسِدْ به ولد أرض الوطن والمقيم
يا عسى جنّة الفردوس مسك الختام
بعد عمرٍ لقوا فيه اليتامى نعيم
شيخ لو ما (محمد) جا (عليّ الحرام)
غير اقول ان من بعده يتيم اليتيم
شيخ لو ما (محمّد) جا شبيهه تمام
غير اقول الزمن في مثل هذا عقيم
آه يا مصعبه موت الرجال العظام
للحبيب الحبيب وللغريم الغريم
حتى الاعدا لقينا فيهم الاحترام
له وهذي دروب اللي حكيمٍ حكيم
يا الله انّك وهو صلّى لوجهك وصام
ترحمه والصبر لجروح باقصى الصميم
امتلينا حزن والصبر نور الظلام
وانت يا رب في جوده عليمٍ عليم
عند وجه المنايا سيّد الجود قام
وقال يا رب أمرك يا العطوف الرحيم
وانت يا الله يا اللي ساهر ولا تنام
جاك ضيفٍ يعِز الضيف وانت الكريم