شعر: محمد سعيد بنواس

رمز الوطن

لا والله اللي ما تهايا لي العيد

يا حسرتي عَ من وِلْمن أعايد

الافراح قفّت والحزانى مشاهيد

هذي السنه (مكتوم) والعام (زايد)

يا عيد لولا الله فارضْك يا عيد

لا قامت الدنيا وثاروا قعايد

حتى بنات الفكر عَنّا مشاريد

الهول أعْظَمْ من بيوت القصايد

وِشْ هو بقى يا قلب غير التنهّيد

عسى الليالي المقبله بالسعاي

الحزن عَمّ البحر والمدن والبيد

فقيدنا (مكتوم) أكبر فقايد

مرحوم يا رمز الوطن والتقاليد

يا صاحب الحكمه بيوم الشدايد

يا بو كفوفٍ بالعطايا مماديد

يا الله عسى انّك في جنان الخلايد

لولا العزا بالله على قبضة الإيد

نرفع كفوفٍ للدعا والشهايد

بالله أمَلْنا ثم بِـ (مْحَمّد) اوكيد

راعي المروّه والعلوم الفرايد

على الجدا والحق ثابت ولا يْحيد

له في بنا الدوله رسومٍ شهايد

طباعة Email
تعليقات

تعليقات