أجمل هديّة

تبختري يا مهرتي يوم تمشين

وتْفاخري بالزين والجاذبيّه

لا شك يوم انّك بجَنْبي تمرِّين

على الأقلْ رِدّي عليّ التحيّه

يا اللي حياتي كل ابوها من الحين

هديّةٍ لك وانتي أجْمل هديّه

مَن ما يقول انّك فتونه وتسبين

كل العقول بْفتنتك يا صبيّه

تشهد لك عْيون الحسَد والمحبّين

وعيوني الثنتين هذي وذيّه

انّك وربّي شيخةٍ للمزايين

ومْن الحلا شبعانه وْمرتويّه

وان عشت انا باعيش مثل المقيمين

على الربوع الجرْد بالمهمهيّه

أعِلّ من كاس الظما عمْر وِسْنين

واذوب من حرّ الهبوب العتيّه

لو ما تفيّيت النَخَل في البساتين

والاّ ترشَّفت الحياض العذيّه