يمهل ولا يهمل

يقول من عارَكْ طواري لياليه

ما قلت لِك تِحْذَرْ جديد الليالي

ما قلت لك يا صاحبي لا تخاويه

الصاحب اللي ما يعَرْف العَدالِ

يرميك في درب الردى من بلاويه

وانته تظنّه من خيار الرجالِ

ما تدري أنّك غافلٍ عن مساعيه

ما تدري أنّه من دعاويه خالي

مثل السراب يْغر من هو نظَرْ فيه

مثل الشجَر مَيِّت ولا به ظلالِ

يا الله من دهرٍ سريعه طواريه

دهاك وانته بين حالي ومالي!!

والخالق اللي كل مخلوق يرجيه

يَمْهِلَ ولا يَهْمِلْ عزيز الجلالِ

يا من تولَّى شان احْرص وراعيه

واحْسِبْ حساب اللي على الخلق والي

شاوِرْ سديد الراي لو ما تدانيه

وأسأَلْ حكيم وصاحب العِلْم غالي

ما خاب من هو راعي العِلمْ يهديه

الخاسر اللي طاوَعْ الجهل تالي

والجاهل يْعادي من الناس هاديه

يجني على المَغْرور جَهْل الجَهَالِ