سِبَقْت.. وْما سِبَقْت إلاّ بعَزْم الفارس المغوار

تبي منْك الدروب تْفِلّها بس انت تطويها

سِبَقْت.. وْخَتْمِك بْأرض الأجانب شِبْه ألسِنْ نار

وطابعْك الفريد يْخَرْبِطْ الحِسْبَه ويلغيها

لك الله ما غدا سَبْقِك مباراه وْبقايا ثار

غدا قصّة بطوله في بطولة قصّتك فيها

تفِلّ أجْنِحْة إصرارك تحدّي والعزوم كْبَار

وتفْرِدْ للسما فرصه وْتِتَفَرَّدْ معاليها

تجي كبْر المدى فوز وْكنوز وترجمة أفكار

مدى يستأثر اسْم (دْبيّ) واسماءٍ يخلّيها

سما تِتْوشَّح إطلاقة يَدِكْ نصْر وحَصِر وايثار

وتهديها كفوف الريح باكورة أغانيها

وتهدي قبضة النصر العيون وتستحيل أمطار

وْتِلْقَفْها القلوب المقفره بـ (الله يحَيِّيْها)

إذا منّك يصحّ العزم ما عنْد الدروب أسرار

تجَغْرِفْهَا على أيّة سَبْق وِتْأرِّخْ تحَدّيها

تغضّ الأرض عين الصبر وِتْصبّر بك المشوار

تِقِلْ لحظة وصولك غيث يتهادى حواليها

أو أنْ لَحظَة وصولك نور يترامى على الأنظار

ويْتكاثف سلاسِل عِيد ويْعيّد مآقيها

وِشْ التصفيق والتصفير والتبريك والأشعار؟؟

بَعَضْ الاحداث كلّ الأربعه ذي ما تكفّيها..!