الشِّعر بك غَنَّى وصابت مراميك
عين الصواب وكل شِعْرك مثالِ
يا الشاعر اللي زاهياتٍ معانيك
يا مبيِّضٍ وجه المِثَلْ والمقالِ
يا استاذي الفاضل ترى فَرْض أجاريك
ويا حَظ من جارى نجم دوم عالِ
واللي بغى يرقى الثريَّا يخاويك
لانّك عزيز النفس ذرب الرجالِ
لَبّيك يا الشاعر من القلب لَبّيك
من قبل لا تْنَادي ألبّي لحالي
واضم انا صوتي لصوتك واناجيك
بالبر والتقوى على كل حالِ
وتدري بي إني يا صديقي أصافيك
ولا خير في ربعه وراها جدالِ
ولا خير في ناسٍ تصافح أياديك
وان ادبروا عنّك رموك بْنِبَالِ
واليوم لك باكتب شعوري واهنّيك
على الكلام العذب يا طيب فالي