أعاذل القلب في حبّك وتعذلني

عواطفي فيك وارجع مِحْسِنْ النيّه

واعاتب الروح في شوقي وتخذلني

واحاوِلْ الصد واكْثَرْ تطري عْلَيّه

يا منية النفس شوقي فيك منفنّي

كَنّي بدنيا بعيده ما بها غَيِّه

ما تنظِرْ لْحَال حبّك كيف مِدْعنّي

كَنّي بتيّار موجٍ والهوا عَيّه

إنْظِرْ بعينك وْحِس بْجَرحك المعني

وانظِر نحول الجسم وِتْرَحَّمْ شْوَيّه

خَلّك عطوفٍ وشوف الوقت يسلبني

أجمل مواسيم عمري راحت ضْحيّه

وش عاد ينفع صدودك وانته المجني

وش عاد عذرك بقلبٍ ذاب موليّ

حَتَّى عذولي بعد ما كان يعذلني

أصبح شفوقٍ يعاملني بْحِنِيّه

وين الأمل لى بصرحه كنت توهمني

أمسى سرابٍ وغابت شمسه الحَيّه

أفْرَحْ بشوفة طيوفك يوم يلفنّي

تجلي هموم الجوى وِجْروح مدميّه

أعيش معها بكل احساس يلهمني

لحظة لقانا ولو هي حْلوم ليليّه

واقول يمكن يجي لك يوم تذكرني

وتشوف حبّك حبيبي وش عمل فيّه