عطَشْ هذا الشعور اللي على غْيابك تغنَّى وناح
عطش بلّل.. مزون الشوق في الولهان بامطار
ذبَلْ غصن الهنا واهدى ثماره للهلاك وطاح
ذبَلْ صوت الدعا حتى.. نسى تسبيحة أطياره
نبت جمر الشقا (ورقا) .. حزينه كل ابوها جْراح
نبت طَلْح الهوى بعدك.. شعور.. وهذي أخباره
يبَس صوت الحكي بعدك يبس كل الهنا وانزاح
يبَس أحلى الكلام وطاح.. شموخ بْآخر أشعاره
بكى باقي الوله وقتٍ قضى فينا فرح وِمْزاح
بكى ليل الهوى دْلالٍ.. شذاها أنفاس سمّاره
تعب ذاك الطريق اللي خذا روحك معاه وراح
تعب يتحمّل جْروحٍ.. غزيره.. تشقي أسفاره
غيابك يا بَعَدْ من لي.. أخذ حِنّا الكفوف وشاح
غيابك خضّب عْيوني.. دموعٍ تفضح أسراره
حزينه شوف كفّيني.. كئيبه يا بَعَدْ من راح
حزينه.. وكيف ما تجزع.. وهي بالحيل منهاره؟!!
غيابك علّم الخافق.. يشبّ النار للمرواح
غيابك جَدَّد الشكوى في همس الريح وِغْباره
واذا بتغيب عن عيني ترى ما لي نديم وصاح
واذا يرضيك تنفيني.. أنا كلّي فدا دْيَاره
صرَخ كل الشعور اللي ورا غيابك سِكَنّي وصاح
صرخ آخر نفَسْ فيني.. يلين إنهدّت أوتاره
وكثر ما نامت القمرا على صدر الفضا وارتاح
كثِرْ ما اشتاق وارضى به.. وأموت بْطَلَّة أنواره