تعال اسْمَعْ تلاحيني وْشِعْري وحَشْرجات سْطور
تعال اسكن مكان الدمع وشِف لك دور في عيني
أنا أسمع بعض صمتك وصمتك لي صدى جمهور
تضجّ بْنَاظري دمعه تزلزل كل شراييني
تعال اقطع حوار الصمت وعطّر شوقنا المهجور
تعال اسكن مكان الحلم تحمَّلْ لا تصحّيني
أجيك لْمملكة شِعْرِك وْكَنّي عبدك المأمور
أجيك بْكل تفاصيلي وْسؤالٍ حايرٍ فيني
تجي مثل الطفل ساعه .. وساعه يا لطيف تْثور
تكلَّم .. انتظِر .. لحظه .. عساه الوقت يمديني
علامك سارح بْفكرك تروح بْلا رِجا أو شور؟
وانا اشرب من هذاك الصمت وبعض الصمت يرويني
تقول مْن الغلا كنّك أخذت مْن الغلا دستور
على طاري الغلا باسأل: بعَدْه القلب مِغْليني؟؟
بعَدْه الصبح متوَلّه لفنجاني وبعْض عْطور؟
بَعَدْهَا (جارة الوادي) دليل لْكل عناويني؟
(صباح الخير يا الغالي) يردِّدْها هذاك السور
على خَد الوله دمعه تجيك بْشوق وِتْجيني
تدلِّلْني على كيفك وتجبر خاطري المكسور
تضيّفني وسِطْ قلبك ونبضاتك تقهويني
إذا صار الهوى لعبه .. ترى لي بْمَسْرَحِيْتِكْ دور
واذا لي بمركبك حاجه .. بأيّة حال رَسّيني
على غنوة (أعز الناس) .. وغنوَتنا (يا بنت النور)
تذكَّرْ دفتري الأحمر واسمك في دواويني
تذكَّرْ بسمتي بمقطع (يا عِقد مْن الوَلَهْ مَنْثور)
وانا انثر من بعض بوحي كأن الشوق معميني
تمنّى وانتظر وقتٍ صعب تتوَسّله .. مغرور
وتتذكَّر هذاك الوِد .. ونبضاتي .. وتلاحيني
تعال لْمملكة شِعْري .. وشوف الفرق والجمهور
ملايين الوجوه إنته .. وهذا بس يكْفيني