يا (دْبيّ) يا بِنْت البَحَر والقصايد

كنّ القمَر مِتْعَلِّق بْهامتِكْ تاج

كَنّ النجوم بْصَدْر ليلك قلايد

يوم انتثر شَعْر الدجى والدجى داج

الموج يهْدِر بالقوافي الفرايد

ولِك مَجْد تحكيه المراكِب للامواج

لك مَجْد ماضي ومجد حاضر وعايد

وياما لجا لك من عَنَا الوقت محتاج

ياما حَكَت بانجاز أهْلِكْ جرايد

الكلّ أنوَرْ لك من عْيونه سْراج

يا موفّقه بِذْراع قايد لقَايد

يا عاليه والعاليِه ما لها دْراج

فيك الحضاره والفَخَر والعوايد

اللي لهم بـ (دْبيّ) للعِزّ مِنْهاج

نالوك صَلْبين الرجال الشدايد

سلام يا نورٍ على الشَرْق وهّاج

يا ماخذه في الحِسْن الاوْحَد شهايد

يحميك مَن خَلْقه على البيت حِجّاج