لِعْن ابوه اشلون عاِلقْ في نحَرْها
ليتها تْشِلّه وتوضَعْني بداله
عِقْدها عايش بجنّه في صَدِرْها
وانا قلبي يحترق يا عزّتاله
إسحَرَتني وانا ما ادري عن سحِرْها
وما هقيت ان السَحِر يسكِنْ غزاله
يوم لَدّت بالنظر ضعْتْ بْنِظَرْها
ما قريت بْعينها عطف وْعداله
سَلَّم الله عينها وْسَلَّمْ حوَرْها
وْسَلَّمْ الله رمش مَكْسيها ظلاله
فتنةٍ الله خَلَقْها من صِغِرْها
كلْ جميلٍ سارقٍ منْها جَماله
ما بها عيبٍ سوى روعة خصِرْها
لو يشوفه عاقلٍ طَوَّحْ عْقاله
كاعبٍ ما زالت بنشوة عمرْها
من رآها للخيال أطْلَقْ خياله
كنّها لا ميّلت خصْلة شَعَرْها
يستميل الكون مَعْ كل استماله
لو تريد الشمس تقبَع في خِدْرها
كْشِفتْ عن وجه بَدْرٍ في كماله
ولو بَغَت بِيْض السحِب تنثر مطَرْها
رْفَعَتْ كَفّ وتساقط من خياله
كل شي أسْتَغْفِرْ الله في أمرْها
من جنوب الكون والاَّ من شماله
الهنوف اللي مشى الوَرْد بْأثَرْها
وَرّدت قلبي مواريد الجهال
وش عليها ان ذَوّقت عيني سَهَرْها
السهَر لعيونها خير وْسَهاله
ما قَهَرْني غير عقْدٍ في نَحَرْها
ضَمَّها ضم (الأبو) لاصْغَر عياله