واجب علينا بالمحبّه نعايِدْك
النصر معنا مثلما فرحة العيد
مبروك يا شيخٍ فعالك تمجِّدك
يا مخلِّد الإنجاز للناس تخليد
أسعدتنا يا الله عسى الرب يسعِدْك
الفوز فرحه ونشوة الفرحه تْزيد
اللي على الشاشات بالعين شاهَدْك
لا شك يا (فَزَّاع) بافعالك يْشيد
حزت انتباهه واجذبنّه مشاهدك
يوم الرسن مقبوض في راحة الإيد
الله واكبر وانت هذي عوايِدْك
ما هي غريبه إن خذت الاوّل بتاكيد
الخيل لك والخيل تعشق مقاصدك
يا الفارس المقدام يا قاهر البِيْد
في كل ميدانٍ تكلَّل تواجِدْك
بالنصر وانته للعَرَبْ مَجْدٍ تْعيد
نهجك سليمٍ منتحي نهج والدك
الفارس اللي ماخذ أوصاف (بوزيد)
ضرغام في الشِّدات بالفكر زوّدك
ينظر ونظراته نَعَمْ دايم بْعيد
واحلى التهاني والتعابير تقصدك
من صادق الإحساس حبٍ وتاييد