ما أحوجنا إلى الدراسات العلمية المنهجية التي تثمن عطاء شعرائنا الشعبيين، وتقدر جهودهم، تقديراً علمياً وعملياً، من خلال نشر الدراسات التي تعنى بهذا النوع من الشعر المحلي، فأهميته لا تكمن فقط بتمثيله للذائقة المحلية الشعبية.
وباعتباره ظاهرة تحظى بلا شك بشعبية كبيرة، وعشاق ومتتبعين كثر، بل هو لب الموروث ويكاد يكون جوهره، بل هو يمثل كذلك قيمة معرفية، ووثيقة تاريخية لا تقل في أهميتها عن الوثيقة المدونة. وحديثنا اليوم مع الوالد الشاعر سعيد بن صالح النعيمي في هذا الإطار التوثيقي.
* النعيم من القبائل العربية العريقة المعروفة، أين كانت مناطق تواجدها في العين قديماً؟
ـ أنا مولود هنا في العين، لكن العرب ومنهم النعيم كانت تتنقل مثل ما تعرف، حد يسكن في مزيد، وحد في أم غافة، وحد صوب حفيت، وناس سكنت الوجن يكدون الأول على ركاب، بيع وشراء وعيشة ضنك.
لكن الأول كانت ال100 درهم أحسن عن مليون اليوم، الله طارح فيها البركة، الناس كانت قلوبها صافية، ماشي حسد اللي عنده يجود على اللي ماعنده، الكل متعارف ومتكاتف.
الأول الناس سكون في خيام وإلا عرش، سووا عريش يابو الدعون وتعاونوا بدون فلوس، واللي يبني تلقاه بانيله مخزن وسبلة من طين، سكان العين خاصة اللي عنده نخيل، كانوا يبنون بيوتا ومنهم من كان يبني من طين، وللحين موجودة خاصة في القطارة، محافظين عليها مثل ما تقول هذا من تراث الأول، الشيخ زايد الله يرحمه كان يحب التراث.
* وماذا عن عادات أهالي العين؟
ـ أيام الأفراح مثل ما تقول إذا استوى عرس الناس تعاونوا ويابو المعونة يكرمون الضيوف، وإلا ذبحوا بقرة وعشوا الربع والا تيس، بدون تكاليف وفنادق وصالات أعراس ، الجارات يساعدن الحريم، الحين وين ما بتلقى حد يصب على ايدك ماي الا بفلوس، الأول ماشي تكاليف ومخاسير، الكل متكاتف، الحين حتى الأرحام متباعدون الأخ ما يشوف أخاه إلا في المناسبات.
الأول إذا غاب حد عن صلاة الفجر الناس تسير تتفقده ليش غاب، يمكن مريض، يمكن محتاج مساعدة. اليوم صلة الرحم قليلة الدنيا شاغلة الناس. الأول الولد ما يخوز عن (أبيه وأمه)، يبا يعرس بنوله عريش وسكنوه قربهم، مرتاحين العصيدة والخبيص واللحم ترى كله متوفر وموجود، اليوم تنشد الواحد تقوله شحال أخيك يقولك والله ماشفته من شهرين.
البنوك والدنيا خدت الناس، قولهم في صلاة استسقاء قليل اللي بيروح، لكن قولهم شي بيع أسهم جديدة في البنوك الكل يترابع ما بتلقى لك مكان في الشارع، الأرزاق من الله لكن الرحم ما ينترك، والحكومة الحمد لله ما مقصرة وشيوخنا طول أعمارهم ما يقصرون والتجار اللي الله عاطنهم خير المفروض يزكون، حتى تروح الزكاة إلى مستحقينها، خاصة عن طريق الهلال الأحمر، وهذه أحسن تجارة، التجارة مع رب العالمين سبحانه، فهو الذي يربي لعباده الصدقات لتنجيهم يوم الحشر يوم القيامة.
* أين كان يجتمع أهالي العين قديماً؟
ـ كانت العين ملتمة عند الشبرة أقصد شبرة السوق الحالي وين الجمعية، هي المركز من يوم وعينا لين حكم الله يرحمه الشيخ زايد، أما هذه المناطق اللي استوت أحياء وانبنت فيها فلل وبيوت جميلة، مثل منطقة فلج هزاع اللي نسكن فيها اليوم.
فكانت هذه المناطق قديما عبارة عن ارض مقناص، الشيخ خليفة الله يطول بعمره يوم هو صغير انا كنت عنده، كنا نعلم الطيور ( الصقور ) في هذي المناطق على الصيد، وصوب طوية وام غافة وهذه المنطقة كان فيها طوي معروف، البدوان تتجمع وتسكن حوله يسقون حلالهم من رواشد ونعيم وشوامس وبني كتب والماي كلن يزوره يدور يسقي حلاله.
الفوعة بقعة معروفة عند عبرية القوافل قديما لانها فيها طوي ماء، والعرب تاتي في الشتا يظهرون من طوية وهيلي والقطارة يخطفون عليها القوافل، اللي ياي من الشمال ساير جنوب يملاون السعن ( قرب مصنوعة من جلد الخروف ) والجربة ( القربة ) اكبر من السعن مثل الجركن اليوم، ويضعونها بعد ملئها على ظهور الركاب أو الحمير، في طريقهم إلى الفريج.
أو كان يستقي الناس من العين لكن طوي الفوعة معروف ان ماءه حلو ودائما أصحاب القوافل المارين قربه ينوخون الركاب حوله، وعلى دلو وحبل ويوردونه داخل البير. في القيظ الناس كانوا يردون البلاد، النخيل، عندك مثلا فلج هيلي كان وادي افلاج تمشي تقول انهار، الظل والرطب والخير.
وفي صفري يوم يخلص القيظ، ردوا الفوعة ببيوت شعر ويسوون سمة (بيوت من خوص النخيل) يدورون سمرة ويباتون فيها، ويوم يضرب المطر مايهمهم شى، عندهم الارطا والحماض وبقرو (انواع من النباتات)، وفي حتى اشياء كانت تنبت ياكلون منها مثل الينم، وهو نبات يشبه الاذرة أو القمح يستعملون حبها يدقونه ويسوون منها عصيدة يخلطونها مع حب القمح أو يطبخونه، ونبات الساقو، نباتات كانت تظهر بعد ما يطيح المطر.
كانت العرب تطبخه مثل العيش، وعندك العرايين العريون يسوونها صالونة، وهو نبات طبيعي احسن عن اللحم، والناس ايامها مافيها لاضغط ولاسكري ولاهل البلاوي اللي نسمع فيها اليوم.
وأهالي العين الأول يمشون مسافات، هل هيلي يسيرون الفوعة، وهل الجيمي يسيرون طوية، وناس المعترض الساكنين هناك وهل المويجعي يسيرون في الشتاء إلى طوي مريفيعة، وهو الذي من طريق دوار الجبل باتجاه المقام غرب وهم سايرين ابوظبي على ركاب، يخطفون العرب على طوي مريفيعة والركاب مرفعات، ويبيعون البضاعة من العين يأخذون الحطب والتمر (الرطب في القيض) ويترسون القيسة يحطون قيستين على ظهر المطية، وياخذون 15 يوم ذهاب واياب من العين إلى ابوظبي.
ويوم يبيعون شغلهم هذا في ابوظبي يشترون المير والروشن الأول الناس تقول المير باكر بييون الطروش وييبون المير وهو عبارة عن الطحين والسكر وقهوة وسمك وكل ما يحتاجونه. ومن العين الناس كانت تطرش دبي وتتمير من هناك.
الظواهر اكثرهم مثل قوم سعيد بن هلال الظاهري وهو كبير الجماعة هو والدرامكة
كانوا يسكنون القطارة، وين مطبخ هيلي وانت ساير من هيلي إلى دوارالمسعودي الأول الناس في النخيل تسكن وكان نخيل الدرامكة في القطارة والناس كانت عايشة على النخيل والبلد كانت عامرة.
* العين ماذا كانت تسمى قديماً؟
ـ العين سموها الأول السبع بلد وأولها واحة العين لأنها عين البلد (والبلد جمع بلدة أو قرية) ومن بعد العين ياك المعترض وبعده المويجعي وكان كثير من الناس المعروفين يسكنون المعترض مثل الشيخ سلطان بن سرور الظاهري ولين الحين هو وعائلته، وفي المويجعي بعد عندك من الظواهر ومكان قصر الشيخ شخبوط قرب مبنى الديوان الحين مقابل قلعة المويجعي على يسارك وانت ساير ابوظبي.
والناس كانت اللي يمرض فيهم سار مستشفى كندي، الأول يسمونها كذي على اسم كندي وهو دكتور، وحرمته اسمها مريم وهو الذي اسسها وكانت في بيت شعبي صغير عقب سوولها مبنى خاص فيها، ذيك الايام يوم حد يمرض والا شي ياتون عند سمو الشيخ خليفة طول عمره، يكتب الشيخ لهم بروة ورقة للدكتور كندي ان عالجوا فلان وعائلته، وولد الاسد اسد كان قايم بالواجب الله يطول عمره من يوم هو صغير ويحب مساعدة الناس. وانشد.
يا ريس الدولة المشهور
يبن الاسد يا بن المناعير
يا سيدي عساك مسرور
يحفظك ربك وين ماتسير
لك سمعتن في البر وبحور
كل شي طورته تطوير
ساعت وليت الامر والشور
يا شيخ لك حكمة وتدبير
انت سخي النفس مذكور
لنك بطل يوم انك صغير
لك هيبتن عن كل مغرور
وانت الشهم ياصاحب الخير
يا ولد زايد مابك اقصور
الرب يشهد والجماهير
* من هم اشهر شعراء العين قديما برايك؟
ـ اشهر شعراء العين الشاعر سعيد بن هلال الظاهري توفي الله يرحمه وقصيده معروف ومشهور، نسمع به قبل مانبتدي بالشعر. والناس الأول تحفظ القصيد ويرددونه، كنا نسمع مثلا الناس يغنون على ند رمل في أوقات معينة من السنة ابيات شعر يقول مطلعها :
يا الراعبي في نايف العود
يلعي طرب ويعد الاصوات
وابغي ثنا من كل منشود
فرحان بوصول الكريات
وان روحن وانت به تقود
من الدكر تضرب كيفات
والشاعر يصف في هذه الأبيات الموسم الذي يحضر فيه الحضار من ابوظبي ودبي إلى العين، وينتشرون في واحاتها المعروفة في هيلي والقطارة يسوون التمر وييبسون اللومي واللي يشل على ركاب يسمونه ( المكري - المجري ) عندما يصل وهو يقود الركايب الناس اللي يايبنهم حق المقيض، وعندما يصل المكري العين ياخذهم إلى العرش الزاهبة المعدلة واليحال (أو اني فخارية يبرد فيها الماء للشرب) ممزورات من ماء الفلج العذب ومناماتهم معدلات ومرفعات عن الدواب والعقارب والحشرات.
والمكري الناس تحسده لانه يسافر وييب ناس ويتعرف عليهم وتستويله قصص وذكريات ومواقف من هذه الرحلات وان كان شاعرهزت مشاعره مثل ماتقول مواقف معينة والا عيب تفجرت القريحة وقال القصيد، والمثل يقول ياليت لي في كل حلة صديج، هذا من فوائد السفر السبعة ان يكون لك معارف واصدقاء والمعرفة بالوصول والتواصل واللقاء والتعارف والعرب الأول دوم اذا سمحت الظروف يتعارفون ويتواصلون.
أما الشاعر المشهور الاخر في العين فهو الشاعر سالم الكاس وله قصيد مشهور غناه بالروغة منه يقول :
هو دقني دق المكينة للدجيج
ثم تم يلعب بي على كيف يباه
قم يا حسن هات القلم هات الدوا
طالت المدة ولاياني نباه
اما الشعراء راشد الخضر والجمري وبن شمسة وبن يدعوه والشاعر قماش شعراء معروفين وبالروغة غنا لهم وايد من القصيد الطيب، الأول الإمارات ما فيها يمكن اكثر من عشرين شاعر مشهور، المعروفين منهم، لكن لما حكم الشيخ زايد الله يرحمه احيا التراث وخاصة عندما اسس المجالس الشعرية وكان أول مجلس هو مجلس شعراء العين، ثم مجلس شعراء المنطقة الغربية وكان هو بروحه يشجع الشعراء، هو روحه يقصد ( ينظم الشعر ) الله يرحمه فهو عميد الشعر ومعلمنا كلنا فنون الشعر.
* ما هي اجمل قصيدة قلتها في البدايات؟
ـ اجمل قصيدة قلتها كانت في البدايات توني أقول الشعر بعدني قلت فيها...
انت الغلا لوما تغليت
وانت الدلع يانظر العيون
يابوجبين يشبه الليت
والا شراة البرق ف مزون
في لبة فوادي لكم بيت
وسط الحشا بانلك حصون
مثلك ولا في الكون ماريت
لون وعون وصدق مزيون
في حبكم تايه تشقيت
وانتو لحالي ماترحمون
مشكلتني في الحب ونسيت
وتابعت قول اللي يسبون
يسعون بالفرقا بلاصيت
وكم فرقوا خل ومضنون
صابر وكثر الصبر مليت
وانتو لحالي ما تعطفون
ماينبني بيت على بيت
ولا يسكن من كان مسكون
غالي معي لو تكون زليت
مسموح يا خلي ولا تهون
* ما رأيك بقصيد سمو الشيخ محمد بن راشد كشاعر؟
ـ قصيد سمو الشيخ محمد بن راشد له محل مرموق، وله أبيات عذبة، مثل الماء الحلو الصافي، وتراه يتنقل بين الأبيات مثل ما تقول يتنقل بين أشجار فواكه، فيها من كل صنف ولون ونكهة، وتدري الحاكم حكيم، ويكفيه ان له باع طويل في الشعر ويشجع دايما الشعر الجميل والشعراء لانه ذو مراس وصاحب فكر وخبرة. لذلك قلت في سموه...
سبحان ياخالق ياعلام
يا واحد يادايم الدوم
واحد احد عينه فلاتنام
يا رب ياحي ياقيوم
يا الله تخلي محمد اعوام
شيخ كريم وال مكتوم
الكم تواريخ وحكام
والكم عوايد والكم رسوم
انت الاسد واسناد الاسلام
وانته سخي النفس مفهوم
راعي الكرم من مثلك اعدام
الناس تنشر عنك بعلوم
ولك تدعي يانسل الاكرام
لنك مفرج عنهم اهموم
ذرب الفعايل نسل الاحشام
من لابة شجعان وقروم.
عمار السنجري: