البارح نْجوم السما يشهدن لي

وانا من المَغْرِبْ على صدر مركاي

الفجر شاخ ولا تغيَّر محَلِّي

على جبين الطَّرْس جَرَّه ليمناي

بين الجنون وْقمَّة العقل مِلِّي

مَحَطِّةٍ كانت بها آخر خْطاي

أحيان أقول إنّي هَبيلٍ مْوَلّي

واحْيَان عندي راي ولا ميَة راي

مْن الغموض يْبين معنى التجَلِّي

والفَن ويش الفَن لولاك يا النَّاي

يا ناس يا لاهين يا ناس من لي

واعطيه من عندي شريدة وصاياي

يتلِّني عِرْقٍ من الراس تَلِّي

واتِل في صحرا الغرايب مطاياي

يا صاحبي وين انت بالله قِلْ لي

لقيت أحَدْ ساري على نفس مسراي

إن كان تَنْشِدْ وش لقيت وْحصَلْ لي

ترى الإجابه كِلَّها في محَيَّاي

أنا على خبْرك وهذا محَلّي

ما يعرفون أدناي والله ولا اقصاي

واللى على الضيعه مولّي يوَلِّي

قِلْ له خطايا الناس ما هي خطاياي