شعر: ناصر بن خادم الكعبي

لا تسافر وتتركني دريك

يا حبيبي وانا قَلْبي معاك

في السفَر يا الغلا خِذْني خُوِيْك

المحبّ الوفي شاري رضاك

يا حياتي أنا منّك وْفِيْك

انت تأمر.. وانا كِلّي فداك

آمِر.. إطْلِبْ.. تدلَّلْ ما عليك

قبل تَشِّرْ.. ألبّي مِبْتغاك

تدري إش كِثْر قلبي يهتويك..؟؟

ما تخَيَّل مَعَزَّتْك وْغَلاك

منفرِد بالغَلا ما لك شريك

وسْط روحي وَلا حَدٍ سواك

حيل مشتاق لك وِدّي أجيك

واحْضِنِكْ شوق وادفى من دفاك

وِدّي ألمس حبيبي راحتيك

واتَجَمَّعْ وَلَهْ ساعة لقاك

وانْظِرْ وْرورد حمْرَةْ وجنتيك

واتنَفّسْك واسْكَرْ من هواك

واهْمِسْ بْمَسْمَعِكْ واموت فيك

واحْتِسِي ذوق شَهْدِكْ مِنْ شِفَاك

يا حبيبي لا تترِّكْني دريك

لا تغادِرْ وانا قلبي معاك