وِشْ جابك الليله وحبّك شِبَع موت..؟!
ما جيت وينك.. يوم ناديت وينك..؟!
ناديت لك بالصوت ما رَدّ لي صوت
ما غير صوتٍ جاوَب الله يعينك
كنت أحسبك للقلب.. وقت الشقا قُوت
غَرَّتْني الدنيا.. وْطَلَّةْ جبينك
وجيت انتخي بك دون عربان وِبْشوت
ما كَنّ في هالكون إلاّ يمينك
وْضَحّكْتني.. والحِزْن في القلب مكبوت
عقب العَنَا ما عَبّرتني يدينك..!
تشرَبْ من ايّامي.. وانا صَمْت وِسْكوت
ويوم الحصاد أحْرَمْتني ياسمينك
عينك على الحنظل.. وفي ثَغْرِكْ التُّوت..؟!
وْشُوف الزهور تْغَارْ من وَجْنتينك
وْرمّانك يْذَكِّرْني بْجَوّ (بيروت)
والْطَفْ خصال الكون متقاسمينك
بالأمس حبّك داخل القلب منحوت
واهْمِلْ سنيني لاجل خاطر سنينك
واليوم حبّك نايمٍ وسْط تابوت
وِجْروح عينك من أصابع يدينك!
وَفِّر حنينك بعد ما فاتك الفوت
وَفِّرْ حنينك.. وش يفيدك حنينك..؟!
كانك زَعَجْت الصوت ما رَدّ لك صوت
ما غير صوتٍ يدعي.. الله يهينك!!